«Զանգեզուրի միջանցքի» մասին կետ խաղաղության պայմանագրում չկա ու չի կարող լինել. Ալեն Սիմոնյան
«Զանգեզուրի միջանցքի» մասին կետ խաղաղության պայմանագրում չկա ու չի կարող լինել: Այս մասին այսօր՝ հունվարի 15-ին, ԱԺ-ում լրագրողների հետ ճեպազրույցի ժամանակ հայտարարեց ԱԺ նախագահ Ալեն Սիմոնյանը:
«Մենք ասել ենք, որ այո, մենք հասկանում ենք, որ Ադրբեջանը իր երկրի մի մասից մյուս մասը տեղափոխվելու համար ճանապարհ է ուզում, ասել ենք, որ պատրաստ ենք բացել բոլոր ճանապարհները իրենց համար, ասել ենք՝ միգուցե հնարավոր է, որ ինչ-որ թեթեւացված գործընթաց լինի, որպեսզի կարողանան տեղափոխվել, բայց կոնկրետ արտատարածքային ճանապարհի մասին ոչ մի բան չկա: Դրա մասին են խոսում երեք հիմնական սկզբունքները, որոնք արդեն իսկ համաձայնեցված են Ադրբեջանի նախագահի հետ Շառլ Միշելի ներկայությամբ, որի մասին 2023-ի հուլիսի 15-ին եղել է հայտարարություն: Ուստի դրա մասին եկեք այլեւս չխոսենք:
Առավելեւս, վարչապետը մի շատ հետաքրքիր ու կարեւոր բան ասաց, որ ադրբեջանցիներն էլ են ասում՝ մեզ այդ ճանապարհը այլեւս հետաքրքիր չէ, մենք Իրանով ճանապարհ ունենք: Մենք ասում ենք՝ մենք պատրաստ ենք նույն տրամաբանությամբ ճանապարհ տանք, որն ավելի կարճ կլինի ու հեշտ կլինի այդ երկաթուղին կառուցել»,-ասաց Ալեն Սիմոնյանը:
Դիտարկմանը, որ Ադրբեջանին այդ ճանապարհը պետք է քաղաքական նպատակների համար, ԱԺ նախագահն ասաց. «Ես չեմ կարող իրենց տեղն ասել: Մենք ազնիվ ենք որպես բանակցող կողմ: Մենք երկկողմանի ունենք վստահության խնդիր, որով հիմա զբաղվում ենք: Մենք հաստատակամ ենք խաղաղություն հաստատելու, տնտեսական նորմալ հարաբերություններ ստեղծելու հարցում»:
